ENSHEIM Homepage


4.5 Mundartgedichte und -geschichten auf Ensemma Pladd


3. Känn Zidd (Keine Zeit; 1991)

Von Birger Bowles

Voor Johre hadd's in Ensemm - wie in onnarre Derfa aa - noch viel meh Geiße gänn wie heijdsedaas, wäll faschd jeela, wo sunschd uffem Halbärch, in da Fawwerigg olla im Rohrwärg geschaffd hadd, nääwehäär noch e bisje gebuurd hadd. Gemäänahonnd honn awwa die paar Morje Lonnd kumm gelongd, fa e greeßarres Schdigg Vieh se halle; dässwää hadd ma sich männschdens medd Gääße begniechd.

So e Gääß hadd Millich gänn, wo ma monnichmohl a Kääs druss gemach hadd, unn männschdens Oschdasunndaa olla -määndaa isch beij monnicha Famillich e Ziggelche gebruttscheld woor.

Fa awwa so e Ziggelche se krien, hadd e gulla Schdurme voorhäär die Gääß zumm Bugg gemißd. De Ensemma Bugg, wo heijd noch 's Wabbe vumm Ortsdääl Häämel ziadd, hadd em ald Breit gehärrd, zu dämm se aa de Schämmbee gesaad honn.

Omme scheene Schbäädsummadaa isch e Frau ussem Owwadorf medd iehra Gääß unneme Honndwäänche zu Schämmbees kumm. (Dass Honndwäänche haddma gebrichd, wäll e Gääß imma nurre änna Wää gelaaf isch - entwella hien zum Bugg olla reduur; fa de onnarre Wää hadd ma se donn ins Wäänche geschdelld.)

Jetze hadd ma awwa nidd äänfach de Bugg unn die Gääß allään meddsomme uff die Wies olla in de Schdall gelass- nää, doo hädd die Sach joo vielleichd viel se long geduurd, olla 's wär garnix passiadd; em Schämmbee sinn Bugg war nämlich aarich schnäägich, däär hadd nidd jeeli ooschäärich Gääß gemeechd.

Doodefoor war de Schämmbee sälwa imma debeij unn hadd sinnem Bugg gullaschbräch uff die Schbring gehulf:" Kumm, hopp, schbring, feijn, feijn schbringe, scheenie Geiß, scheenie Geiß!" So halla ne imma uffgemunnadd unn zu sinna Pflichd iwwaredd. Dass Bugge war also im widdschdarre Sinn em Schämmbee sinn Sach.

Onn dämm Daa war de Schämmbee awwa grad henne im Schdigg Raaschee ussmache, wie sällich Frau medda buggich Gääß im Wäänche onn Schämmbees Hussdia bolladd. Em Schämmbee sinns kimmd russ unn frääd: "Gunndach, wass wollena donn? - "Ei, die Gääß bugge lonn!"

Doo saad em Schämmbee sinns: "De Schämmbee hadd känn Zidd und ich bugge nidd!"

(Ausgezeichnet beim 13. saarländischen Mundart-Wettbewerb 1991)


Literaturtip: Paul Glass: Ensemma Platt. Der Wortschatz der Ensheimer Mundart. 2 Bände. Ensheim 1975 und 1976 (= Ensheimer Wörterbuch, Bd. 1 und 2)
Zurück zum Anfang des Dokuments

Zurück zur Mundart-Auswahlseite

Zurück zur Gedicht-Auswahlseite

Zurück zum Inhaltsverzeichnis

Zum Kapitel: Aussprache und Grammatik der Ensheimer Mundart



eMail an den Webmaster

© Paul Glass 1997 - 2001 ff