ENSHEIM Homepage


4.5 Mundartgedichte und -geschichten auf Ensemma Pladd


7. Ich hònn die Flämm (Ich bin down; 1987)

Von Paul Glass

Jeerem, Joorem, wass honnich heijd die Flämm! Ich kinnd grad furtlaafe! Meechd nurre wisse, wass fa e Luss ma iwwa die Läwwa gelaaf isch.... Ich kommich sälwa nidd vaknuuse.

Debeij hadds ma gischda owed beijm Flori noch so gudd oongelää. Wass homma sesomme gefoozd, de schooges meddnonna gemach und die Kuh fliehe gelass! Und sie scheene Pilsja homma geschmaggd, änns nohm onnarre honnich abgebummbd. Hm, 's war vamässe binnich...

Unn jetze die doo Flämm. Mänsch, 's war ma doch nidd hillich unn nix, ich honn känn Kälbche oongebunn dienaachd, ich honn känn digga Kobb kritt, honn gudd geratzd - unn doch honnich jetze die Flämm. Heijeijei, doo kinnsche doch grad die glatt Wonnd hochkrawwele! Olla grad de Gääßegichdarre krien... Olla alles sesomme. Hagguddnochemohl, honn ich die Flämm. Ich kinnd mich sälwa duure. Dass mußma sich emohl voorschdelle: Hugg ich Monnskärl doo unn dunn Driebsal bloose, awwa noh Noole. Ich glääb, 's gedd loss! Unn jeeli Migg onn da Wonnd dudd mich hinnarre, als kinnd die äbbes fa minn Flämm. Also, ich wääß nidd.. Nervich sinnich, kommich sälwa nidd schmagge... meechd nurre wisse, wass medd ma loss isch?

Ich männ, 's konn jo sinn, dass dass letschde Bierche seviel war. Awwa 's hadd ma doch so aarich gudd geschmaggd. Unn ussadämm: wäär dudd schunn gäär beijeme scheen gezäbbde Pilsje e Urwes mache... dass gedd joo aa nidd!

Vielleichd hällich solle ehnda hämmgehn unn mich ins Neschd leeje? Awwa hugguddnochemohl, ich honn doch heijd freij unn honn kinne leije bliwwe. Unn jetze huggich doo allään in da Kich, leffele pässich im Kaffee rumm unn kaue uff da Huunichschmeer grad wie uff Deere. Voor ludda Flämm! Nää, nää...

Ich männ, 's kinnd joo aa sinn, dass dass Schisswälla doo droon schillich isch! Awwa uff da onna Sidd, ma konn sich joo nidd wäll jeelem Schutt grad so hängge lonn. Hach, ich wääß joo aa nidd...

Saggradiss nochemohl! Warum honnich nurre so e Flämm? Warum ussgerächend heijd? Warum ussgerächend ich? 'S kinnd doch aa e onnarra die Flämm honn. So,ne, die wo sowieso 's gonnz häälich Johr nix se lache honn. Beij dänne gähng's joo widdschda gar nidd ufffelle. Awwa nää, ich arma Deijwel, ich krinnse! Unn honn jetze minn Huddel demedd. Hach, ich muß mich äänfach sälwa e Schdurme duure, vielleichd gedd's man donn e Ideeche bessa... Eichendlich solld ich mich joo grad willa ins Neschd leeje unn die Beddegg iwwa ma ussbrääle. In de Schbichel konnich joo grad gar nidd luh, doo kimmd's ma joo grad enunneruff. Wäll ich e Gesichd mache wie achddaa Räänwälla! Haggudd, ich wääß joo aa nidd, warum?

Nää, nää, 's läälich Seffa, die ald Truurwääd, ischo doo noch Gold degähng! Ich wääß nurre änns: glich mußäbbes passiere olla ich krinn noch e diggarra Hals. Dass doo hallich äänfach nimmeh uss. Ich kommich sälwa nimmeh lille, dass konn doch so nidd widdschdagehn. Ich sinn doch känn Weijbsminsch. Dass wo de gonnze longe Daa e Flännsch dudd ziehje voor ludda Flämm. Nää, nää, so e Flännschegreet sinnich nidd. Jetze nidd unn iwwahaabd nidd! Oh, lägg mich in da Kabb geschess! Jetze honnich die Gumschel geschriche voll. Wie hadd de ald Baddiss friehja imma gesaad: Hasche die Flämm, blibb uff kääne Fall dehämm!

Allo, doo hommass doch! Wart nurre, ich krinn dich, du hasch dinn letschda Furz gelass! Jetze dunnich mich nämlich dabbache oon unn donn nix wie zum Ferno. Fa schdigga zwei, dreij Biercha. Ich glääb, ma gedd's schunn grad bessa...


Literaturtip: Paul Glass: Ensemma Platt. Der Wortschatz der Ensheimer Mundart. 2 Bände. Ensheim 1975 und 1976 (= Ensheimer Wörterbuch, Bd. 1 und 2)
Zurück zum Anfang des Dokuments

Zurück zur Mundart-Auswahlseite

Zurück zur Gedicht-Auswahlseite

Zurück zum Inhaltsverzeichnis

Zum Kapitel: Aussprache und Grammatik der Ensheimer Mundart



eMail an den Webmaster

© Paul Glass 1997 - 2001 ff