Jakob: " Ach, Honnes, ich kinnd grad haad griene! Dass war häid willa soe Daa, ich konnda soon: Niggs wie Huddel!"
Hans: "Ei, vazehl emohl, Jääb, wass ischonn passierd
Jakob: "Du, Honnes, dass duschema gaa nidd glääwe! So viel Huddel uff ämohl! Also, 's hadd schunn demorje oongefong. De Wegga hadd nidd gerabbeld, wäll häid Naachd bäi uns im Unnadorf de Schdroom ussgefall war. Unn wass waa: Ich hommich vaschloof! Zumm erschde mohl iwwahaabd, zinnda dass ich schaffe gehn! Joo, unn wällich nidd alseviel wolld se schbääd kumme, honnich mich aarich gedummeld.Unn du wääschoo selwa, wie's gedd, wenn's ääm prässierd:: Doo dudd's voore unn henne nidd glabbe! Uff jeele Fall, wass ich da wolld soon: Ich mich vamässe gedummeld, schunn känn Kaffee gedrungk unn donn honnich drunne uff da Bräbacha Lonndschdrooß e Gnellche kridd!Hans: "Ei, fawass donn e Gnellche?"
Jakob: "Ei, wäll ich se schnell gefah sinn! Doo därfma nurre 60 fahre, unn ich honn iwwa 80 uffem Tacho gehaad!"
Hans: "Ouwawou, Jääb, dass wärrd dier!"
Jakob: Wieso 'wärrd'? Ich honn uff da Schdell misse bläche, wäll e Schdiggelche widdschda zwei Griene geschdonn unn mich russgewungk honn ... zweihunnaddfuchzich Märgga!
Hans: "Joo, Jääb, dass ischunn e Huffe, awwa dässwää bruchsche dich jeddse nidd färrdich se mache.'S isch da hald passierd..."
Jakob: "Ei, nää, Honnes! 'S ischo nidd ellään wäll dänne 250 Maag. Dass waa noch längschd nidd alles, wääsche. Wie ich bäi da Kardex in de Hoof eninngefahr sinn, do honnich medda lingk Sidd e Lonndaposchde meddgeholl... Doo dunnich schunn wiffel Johre droon voorbäi fahre, unn nie isch äbbes passierd. Awwa häid morje, donn waa's donn sowidd: De gonnze Karre hadd e Schromme vunn henne bis voore! Und där ischo noch niddemohls e halwes Johr ald. Unn die Vasicherung dudd joo dass nidd bezahle, wääsche. Wäll, ich waa joo sälwa droon schillich. Heijajei, niggs wie Huddel, ich konnda soon. Joo, unn's ischo noch widdschda gong, joo, pass nurremohl uff: Ich sinn nodierlich faschd e onnatalb Schdunn se schbääd kumm, kumme in die Firma unn schunn hadd ma de Schäff noch Frächhääle gemach. So gullaschbräch: Ei, wo ich jeddse häärkääm;. Oh, donn hadds ma joo gelongkd. Donn honnichem joo glich die Määning gesaad! Doo kännich joo niggs, Schäff hien olla häär, dass wääsche joo! So gedd's joo aa nidd, kimmd ma äämohl se schbääd, michd däär ääm glich zur Sou! Däärsäll hadd häid glääwich sälwa känn gulla Daa gehaad! Joo, unn donn omm Nohmiddaa..."
Hans: "Ei wie? Bische noch nidd färrdich?"
Jakob: "Oh geh doch furrd! Also omm Nohmidda isch donn's näggschde passierd. Ich honn grad die Drääbongg wille nou innschdelle, doo felld ma doch so e Schdigg Konndiese uff die lingk Zeeb. Saggradiss! hadd dass weegedoon! Ich dabba zumm Doggda, däär hadds gerennschd unn wärrsch's nidd glääwe: nodierlich gebroch!"
Hans: "Ah, dässwää leefsche aa so komisch?"
Jakob: "Ei joo, Honnes, sie honn doch noch känn Gibbs kinne druffmache, wäll die Zeeb so aarich geschwull isch. Awwa morge olla iwwamorje krinn ich donn druffgemach..."
Hans: "Ja, horchemohl, konnsch du donn omm Dunnaschdaa iwwahaabd die Vaddadaaswonnarung vumm Arion meddmache, medd dämm Fuuß?"
Jakob: "Ei nää, dass isch's doch! Ich wäär doch so gäär meddgong, awwa sischo: Niggs wie Huddel!"
Top | Mundartgedichte-Auswahl | Mundart-Auswahlseite
| Inhaltsverzeichnis
Bitte beachten Sie meine Datenschutzerklärung!
| Last update: 29.11.2023 | Copyright: Paul Glass 1997-2023 |