ENSHEIM Homepage

4.5 Mundartgedichte und -geschichten auf Ensemma Pladd

4. Känn Zidd (Keine Zeit; 1991)

Ma honn grad sesomme midda gäss,
doo isch onn minna Buggs e Nòòd geress.
Also fròò ich minn's, ob ääs nidd
die Buggs kinnd fligge? "Nää", seed's, "honn känn Zidd!"

In da Schuul dudde Lehra aarich schille
wäll die Schuulakenn nidd lehre wille.
'S geddem jeddse ächd se widd:
"Ma gähngde joo lehre, awwa ma honn känn Zidd!"

Bäim Nochbar driwwe willich äbbes lehne,
doch däär schbield grad medd sinne Klääne.
Wassich wolld, dass krinnich nidd:
"Duddma lääd, honn grad känn Zidd!"

Ma konn wirglich duun unn mache,
konn klääne olla grooße Feschdja mache.
Doch monniche Gäschd, die kumme nidd.
"Ich konniggs mache, ich honn känn Zidd!"

'S ischo wirglich schunn vamässe
unn ma därf's aa nidd vagässe,
awwa degg härrd ma's schunn wie widd:
"Morje, seesche? - Doo honnich känn Zidd!"

"Ich honn känn Zidd!" Dass härrd ma degg,
's nimmd ehnda zuu unn gedd nidd ewägg.
Debäi schaffe ma so winnich wie noch nie
unn dunn uns sälwa noch belie:
Ma muß doohien unn muss dass noch mache,
de Fräiziddschdräss michd medd ääm de Narre.
Die Fräijzidd isch dodaal vaploond,
wäär hädd dass voor dräißich Johr geòòhnd?
'S Lääwe ròòsd nurre soo voorbäi,
ma kridd die Zidd nidd uff die Räih,
doch äänes Daa's felld ma ins Loch,
donn hadd ma Zidd grad noch unn noch!

Drum dunn e Schdurme longsomm mache
unn lonn och Zidd fa die scheene Sache.
Lonn och nidd vaploone olla heddse,
lonn och nidd zu allem grad vaschwäddse.
Foodse nidd in da Geechend rumm wie widd:
Donn honna aa genungk e Huffe Zidd!

Top | Mundartgedichte-Auswahl | Mundart-Auswahlseite | Inhaltsverzeichnis  

Bitte beachten Sie meine Datenschutzerklärung!