Debäi hadds ma gischda owed bäim Flori noch so gudd òòngelää. Wass homma sesomme gefòòdsd, de Schooges meddnònna gemach unn die Kuh vamässe fliehe gelass! Unn die scheene Pilsja homma geschmaggd, änns nohm onnarre honnich abgebummbd. Hm, 's waa vamässe binnich...
Unn jeddse die doo Flämm. Mänsch, 's waa ma doch nidd hillich unn niggs, ich honn känn Kälbche òòngebunn dienaachd, ich honn känn digga Kobb gridd, honn gudd geraddsd - unn doch honnich jeddse vamässe die Flämm. Heijeijei, doo kinnsche doch grad die gladd Wonnd hochkrawwele! Olla grad de Gääßegichdarre krien... Olla alles sesomme. Hagguddnochemohl, honn ich grad die Flämm. Ich kinnd mich sälwa duure. Dass mussma sich emohl voorschdelle: Hugg ich Monnskärl doo unn dunn Driebsal bloose, awwa noh Noole. Ich glääb, 's gedd loss! Unn jeeli Migg onn da Wonnd dudd mich hinnarre, als kinnd die äbbes fa minn Flämm. Also, ich wääß nidd.. Nervich sinnich bis dordenuss, kommich grad sälwa nidd schmagge... meechd nurre wisse, wass medd ma loss isch?
Ich männ, 's konn jòò sinn, dass dass leddschde Bierche seviel war. Awwa 's hadd ma doch so aarich gudd geschmaggd. Unn ussadämm: wäär dudd schunn gäär bäieme scheen gezäbbde Pilsje e Urwes mache... dass gedd jòò aa nidd!
Vielleichd hällich solle ehnda hämmgehn unn mich ins Neschd leeje? Awwa hagguddnochemohl, ich honn doch häid fräi unn honn kinne läie bliwwe. Unn jeddse huggich doo allään in da Kich, leffele pässich im Kaffee rumm unn kaue uff da Huunichschmeer grad wie uff Deere. Voor ludda Flämm! Nää, nää...
Ich männ, 's kinnd jòò aa sinn, dass dass Schisswälla dòò dròòn schillich isch! Awwa uff da ònna Sidd, ma konn sich jòò nidd wäll jeelem Schudd grad so hängge lonn. Hach, ich wääß joo aa nidd, wass grad meddma loss isch...
Saggradiss nochemohl! Fawass honnich nurre so die Flämm? Fawass ussgerächend häid? Fawass ussgerächend ich? 'S kinnd doch aa e onnarra die Flämm honn. Sone, die wo sowieso 's gonns häälich Johr niggs se lache honn. Bäi dänne gähng's jòò widdschda gar nidd ufffelle. Awwa nää, ich arma Däiwel, ich grinnse! Unn honn jeddse minn Huddel demedd. Hach, ich muß mich äänfach sälwa e Schdurme duure, vielleichd gedd's ma donn e Ideeche bessa... Eichendlich solld ich mich joo grad willa ins Neschd leeje unn die Beddegg iwwa ma ussbrääle. In de Schbichel konnich jòò grad gaa nidd luhe, doo kimmd's ma jòò grad enunneruff. Wäll ich e Gesichd mache wie achddaa Räänwälla! Haggudd, ich wääß joo aa nidd, fawass ich so die Flämm honn?
Nää, nää, 's läälich Seffa, die ald Truurwääd, ischò doo noch Gold degähng! Ich wääß nurre änns: glich muss äbbes bassiere olla ich grinn noch e diggarra Hals. Dass doo hallich äänfach nimmeh uss. Ich kommich sälwa nimmeh lille, dass konn doch so nidd widdschdagehn. Ich sinn doch känn Wäibsminsch. Dass wo de gonnse longe Daa e Flännsch dudd ziehje voor ludda Flämm. Nää, nää, so e Flännschegreed sinnich nidd! Jeddse nidd unn gradselääds nidd! Oh, lägg mich doch in da Kabb geschess! Jeddse honnich die Gumschel geschriche voll. Wie hadd de ald Baddiss friehja imma gesaad: Hasche die Flämm, blibb uff kääne Fall dehämm!
Allo, dòò hommass doch! Waad nurre, ich grinn dich, du hasch dinn leddschda Furds gelass! Jeddse dunnich mich nämlich dabbache òòn unn donn niggs wie zum Ferno. Fa schdigga zwei, dräi Biercha, suwwache gezäbbd. Ich glääb, ma gedd's schunn grad aarich bessa...
Top | Mundartgedichte-Auswahl | Mundart-Auswahlseite
| Inhaltsverzeichnis
Bitte beachten Sie meine Datenschutzerklärung!
| Last update: 29.11.2023 | Copyright: Paul Glass 1997-2023 |